पालकमंत्री गुलाबराव पाटील यांनी आज जिल्ह्यातील विविध विकास कामांना भेटी देऊन पाहणी केली….

बुलडाणा, दि. १० : पालकमंत्री गुलाबराव पाटील यांनी आज जिल्ह्यातील विविध विकास कामांना भेटी देऊन पाहणी केली. पारखेड, लोणी काळे, जानेफळ येथे भेटी देऊन पाणीपुरवठा योजनांची माहिती घेतली. यावेळी आमदार डॉ. संजय रायमुलकर उपस्थित होते.
श्री. पाटील यांनी पारखेड येथील पाणीपुरवठा योजनेच्या नियोजित जागेची पाहणी केली. यावेळी त्यांनी ग्रामस्थांशी संवाद साधला. लोणी काळे येथे सात गावांची योजना मंजूर झाली असून यासाठी 14 कोटी रुपये मंजूर झाले असल्याचे सांगितले. ही योजना टाकळी आणि कोराडी धरणावरून पाणी पुरवठ्यासाठी घेण्यात येणार आहे. यामुळे सात गावांचा पाणी प्रश्न सुटणार आहे. येत्या दोन वर्षात हे काम पूर्ण करण्याचा मानस असल्याचे त्यांनी सांगितले.
जानेफळ येथील ग्रामपंचायतीमध्ये नागरिकांशी संवाद साधताना श्री. पाटील म्हणाले, जानेफळ गावासाठी 13 कोटी रुपयांची वाढीव पाणीपुरवठा योजना मंजूर करण्यात आली आहे. कळंबेश्वर जानेफळ ही योजना मंजूर करण्यात आली आहे. ही योजना सौर उर्जेवर चालणारी असणार आहे. तसेच जानेफळ शहरासाठी वळण रस्ता ही मंजूर करण्यात आला असल्याचे त्यांनी सांगितले.