सुरक्षित आणि अधीकृत वीज जोडणी घेवूनच साजरा करा दुर्गोत्सव;* महावितरण *घरगुती दराने होणार वीज पुरवठा*

*सुरक्षित आणि अधीकृत वीज जोडणी घेवूनच साजरा करा दुर्गोत्सव;* महावितरण

*घरगुती दराने होणार वीज पुरवठा*

बुलडाणा, दि. 19 सप्टेंबर 2025:
सोमवार पासून दुर्गोत्सवाला सुरूवात होत आहे. उत्सव काळात भक्तिभावाने उत्सहात सहभागी होत असलेल्या लाखो भाविकांच्या सुरक्षिततेसाठी दुर्गोत्सव मंडळांनी अधीकृत वीज जोडणी घेवूनच उत्सव साजरा करावा असे आवाहन मुख्य अभियंता राजेश नाईक यांनी केले आहे.

महावितरणने सार्वजनिक उत्सव मंडळांसाठी तात्पुरती वीज जोडणी देण्याची व्यवस्था केली असून केवळ घरगुती दरात वीज जोडणी देण्यात येते.

> सुरक्षिततेची पहिली पायरी

*अधिकृत वीज जोडणी:*

उत्सवातील रोषणाई, आकर्षक देखावे, मंडप, महाप्रसाद आणि इतर कार्यक्रमांसाठी लागणारी वीज व्यवस्था फक्त अधिकृत वीज कंत्राटदारांकडूनच करून घेतली पाहिजे. बेकायदेशीर आणि अनधिकृत वीज जोडण्यांमुळे शॉर्ट सर्किट किंवा इतर गंभीर अपघात होण्याचा धोका असतो. म्हणूनच, सुरक्षेशी कोणतीही तडजोड न करता अर्ज करताच मंडळांना तात्पुरती वीज जोडणी दिली जाईल. असे महावितरणकडून स्पष्ट करण्यात आले आहे.

*अशी घ्या काळजी:*

मंडपातील विजेचे वायरिंग अत्यंत व्यवस्थित आणि प्रमाणित असावे. मीटर केबिनमध्ये जाण्याची परवानगी केवळ अधिकृत आणि प्रशिक्षित व्यक्तीलाच द्या. वीज जोडण्यांसाठी नेहमी दर्जेदार वायर आणि स्विच वापरा. आपत्कालीन परिस्थितीत संपूर्ण मंडपाचा वीजपुरवठा एकाच स्विचने खंडित करण्याची सोय असावी. तुटलेल्या वायर जोडण्यासाठी केवळ दर्जेदार इन्सुलेशन टेपचाच वापर करा. मीटर आणि स्विच जवळचा रस्ता नेहमी मोकळा ठेवावा, जेणेकरून गरज पडल्यास त्वरित पोहोचता येईल. मंजूर झालेल्या भारापेक्षा मंडपातील विजेचा वापर जास्त होणार नाही याची विशेष काळजी घेण्याचे आवाहन महावितरणतर्फ़े करण्यात आले आहे.

*मदत उपलब्ध:*

आणीबाणीच्या परिस्थितीत त्वरित मदतीसाठी महावितरणने 24 तास उपलब्ध असलेले टोल-फ्री क्रमांक दिले आहेत, 1912, 1800-233-3435. 1800-212-3435 किंवा 022-50897100 या क्रमांकावर मिस कॉल देऊनही संपर्क साधू शकता. मंडळाच्या पदाधिकाऱ्यांनी स्थानिक महावितरण अभियंता आणि ‘जनमित्रांचे’ मोबाईल क्रमांक जवळ ठेवावे, असं आवाहनही करण्यात आलं आहे.

*अनामत रक्कम: सोपी प्रक्रिया, त्वरित परतावा:*

तात्पुरत्या वीज जोडणीसाठी मंडळांना त्यांच्या मंजूर वीजभाराप्रमाणे अनामत रक्कम भरावी लागेल. ही रक्कम ऑनलाईन भरल्यास, उत्सव संपल्यानंतर वीजबिलाची रक्कम वजा करून उरलेली रक्कम विनाविलंब परत केली जाईल. यामुळे रक्कम परत मिळवण्यासाठी वाट पाहावी लागणार नाही आणि मंडळाची प्रक्रिया अधिक सुलभ होईल.